الجمعة، 29 فبراير 2008

آراء أعجبتني




النهادره هكتبلكوا شوية اراء عجبتني ويارب تعجبكوا......


*خرجت حواء من ضلع الرجل لتحطم باقي الضلوع..


*الشيطان استاذ الرجل تلميذ المرأة..


*اذا اردت ان تعرف مساوئ المرأه فتزوجها(بس خد احتياطاتك برده)..


*عندما تتكلم عن نفسك لامرأة فسيسعدها حديث أموالك..


*الاطفال..يجدون ماما قليلا,بابا كثيرا,الاثنين معا؟؟؟نادرا..


*الجواز..واحد يصفق والثاني يرقص وآخر يلطم..


*الزواج للرجل ..يدفع المهر, يتمتع شهر, يتعذب باقي الدهر..


*لا يغرك من الثعبان ملمسه..كله فاهم اصدي طبعا!؟


دلوقتي بقه هكتبلكوا عن راي الاستاذ أنيس منصور في المرأة


*أسرع وسائل الانتشار في العالم‏:‏ التليفزيون والانترنت والتليفون‏..‏ والمرأه‏.


*مخيف‏:‏ جيش من النساء يقوده رجل‏..‏ مخيف جدا‏:‏ جيش من الرجال تقوده امرأه.


*لن تندم كثيرا اذا أحببت أي شئ غير المرأة.


*المرأة عندما تطلب النصيحة.فانها تريدك ان توافقها رأيها.


*ملكات جمال الكون كلهن من كوكب الأرض.


*آخر مايموت في المرأة لسانها.


*أسوا مافي الحب المرأة.


*الفتاة تفضل أن تتزوج رجلا مثل والدها وهذا هو سر بكاء الامهات ليلة الزفاف.


*هناك فرق بين المرأة والكمبيوتر:اذا أخطأ الكمبيوتر فانه لا يلوم أحد غيره .


********************


دي كانت أراء الاستاذ أنيس منصور في المرأة لكن أنا ليه رأي خاص جدا ومختلف تماما هو انك ياريت تتجنب المرأة خالص.


وعشان ما أكونش ظلمت حد أحب أعرف رأيكم في الكائن اللطيف الوديع اللي هو الراجل يعني....؟


الاثنين، 25 فبراير 2008

عم موسى

عـم موسـى راجل بسيط ...لا ليـه في الطــور ولا في الطحيــن
حب يقرب من ربنا قام دخل في سين وجيم وفضلت عليه العين
قال يعيش علي السنة ويربي دقته وكانت غلطه دفع تمنها سنين
ولما كان لابيصلي ولا بيصوم ولا يعرف طريق القبلة فين
لا حــد قالــه رايــح فين ..ولا حــد قـاله جاي منين
المهم بهدلوه وفي السجن دخلوه ..ولا هو عارف التهمه فيــن
ومقضيها يوم في الحبس ويوم في امن الدولة والناس تقول يا حرام مسكين
بعد شهريــن رجـع عـم موسـى, لكن يا خسارة بعيــن وعيــن
سألناه :إيه حصلك يا عم موسي.. قال: إن قلت هيروحو الاثنين
لكن برضه عم موسي صبر مايأسش وشكا أمره لرب العالمين
ورجع الشغل لقاهم رفدوه ..وولاد الحلال ساعدوه بس الأجر يادوب قرشين
عم موسي فضل يفكر ..وفي الآخر قرر يشتغل شغلانتيــن
لكن الحكومة وراه وراه.. لأ وحطوه في قايمـة المطلوبيــن
كل يوم والتاني ياخدوه وفي البكس يدخلوه ومانشوفوش غير بعد شهرين
زهق صاحب الشغل منه وقاله ماشوفش وشك من هنا ليوم الدين
روح عم موسي ودمعته علي خده ليه حق والله يروح حزين
علـى حـال الدنيـــا ..وحــال كــل البني آدميــن
ليـــــــه ساكتيـن مع إنهم عارفيــــن... طريق الظلم فيــن؟؟؟

الأحد، 24 فبراير 2008

من هنا ومن هناك



من هنا ومن هناك كل يوم نسمع خبر..ساعات كتير بنصدقه وساعات كتير نقول ده كله كدب...

ساعات بنفرح وساعات بنحزن لكن المهم إننا بنحس حتي لو ماحدش سامعلنا حس..كتير أقول هو أنا حظي ليه في الدنيا دي قليل وكتير من كتر حظي أحس إني ولي من الأولياء الصالحين...

وفي النهايه إحنا بشر أوقات نشوف في الورد لونه وبهجته وكتير مابنشوفش فيه غير شوكه وقسوته...
ما إحنا كده ساعات نكون أشرار والظلم لينا حلال وساعات من طيبتنا نكون أطفال...
أصل الحياة كده.. فيها البشر أشكال وكل ساعه في حال...
وعلي رأي اللي قال:

مع إن كل الخلق من أصل طين
وكلهم بينزلوا مغمضين
بعد الدقايق والشهور والسنين
نلاقي ناس أشرار وناس طيبين
عجبي!!