الثلاثاء، 6 مايو 2008
المنحــه يـــــا ريـس
كل سنه في عيد العمال يمني العمال أنفسهم بالعلاوه التي ستغير مجرى حياتهم وتنقلهم من مستوي لمستوي تاني خالص زي الأولاني بالظبط....!
في عيد العمال جاء السيد الرئيس يبشرنا بالعلاوه وفجر المفاجأة في الحاضرين وقال ان العلاوه 30% ..هو قالها من هنا وأنا قلت يارب الأسعار ماتزيدش الا لما نلحق نصرفها حتي...! لكن هيهات (انسى يا عمرو).
مش فاهم الحكومه بتاعتنا دي بتفكر ازاي ده لو كانت بتفكر أصلا؟؟
امبارح السيد يوسف بطرس غالي وزير الماليه في البيت بيتك بيقول احنا زودنا أسعار الوقود وتراخيص السيارات والغاز الطبيعي (اللي بندعم بيه اسرائيل لمدة 20سنه) وكلام كتير كده. وطبعا يا جماعه انتوا عارفين ان ده كله ملزق في بعضه يعني لو زاد سعر البنزين والسولار والكلام ده ,السواقين هيزودوا الأجرة هما كمان؟
وبيقول" أنا كنت عامل حسابي ان أقصى نسبة للمنحه كان متوقعها واللي هو كان مجهز نفسه على أساسها بالعافيه على حد تعبيرة كانت 15% " المهم الريس خلاها 30% وبما ان الميزانيه مش مؤهله لده فهو ليه طرقه اللي هيدقر يوفر منها موارد . وتيجي تسأل أي حد في الحكومه يقولك " إحنا درسنا الموضوع وعملنا اللازم " لكن بصراحه الكلام بيعكس حقيقه واحده بس : هي ان الرئيس بيتصرف من دماغه ولا في دراسه ولا هجص ولا كلام من ده.لأنه كان المفروض يشوف أقصى امكانياتنا ايه ويقول على أساسها المنحهكام في الميه.
لكن هما بيعرفوا يصرفوا نفسهم كويس أوي ..المشكله بقه انهم حتى ما استنوش لغاية ما الشهر الجديد يبدأ .وزودوها قبل ما حد يتهنى بالمنحه.
والغريب ان أي حد في الحكومه والحزب الوطني حافظ نفس الطقم لما يتسأل أي سؤال يرص الكلام ورا بعضه على طول.ولازم أول كلامه يكون محدود الدخل عشان يبين انه مع المواطن الغلبان والكلام ده كله.
أنا عندي سؤال :هو ايه الفرق بين محدود الدخل والمتكسح؟
يعني محدود الدخل ده بالنسبه للحكومه هو البني آدم المتكسح اللي مابيخرجش من البيت ولا هما الناس الميتين ؟ ازاي يبقى همهم على محدود الدخل وهما عارفين ان زيادة أسعار الوقدود بيزيد معاها سعر أجرة المواصلات؟ده على أساس انه متكسح!؟
واللي يغيظ ان تمورة( تامر أمين) كان قاعد مع وزير الماليه كأنه كتكوت مبلول كل اللي عليه يقول أه وبس. لما وزير الماليه حس انه طالع رحله.
والله منى الشاذلي أرجل منه ..وعجبني كلمه اتقالت في العاشرة مساء إمبارح, قالها عضو مجلس شعب من المعارضه وأنا هختم بيها البوست ده.
الحكومه في مصر ماشيه بمبدأين؟
1-ليه المواطن ياخد أكتر لما ممكن ياخد أقل؟
2-عيش اللحظه(يقصد ان مافيش تخطيط ولا كلام من ده )
الاشتراك في:
تعليقات الرسالة (Atom)
.jpg)
هناك 6 تعليقات:
يابختهم أهل إسرائيل نفسي الريس بتاعنا يبصلنا بنظرة عطف ذيهم
يابختهم هاتبقي حكومتهم وامريكا ومصر كمان
مفقوعة مرارتي من حماتــــــــــــي
ايه السرعه دي أنا لسه مخلص البوست حالا عموما بشكرك جدا على تعليقك.
الاجرة زادت واخدوا اضعاف العلاوة تانى
انت مفقوع من تامر جرب تشوف عمر وشلته وانت تعرف ان تامر نعمة على الاقل مش بتحس انهم جايبين ناس من بره البلد ومش حاسين بالفقر ولا الحوجة وبيتكلموا عن رغيف العيش ولا يوم ما كانوا بيكلموا زكريا عزمى على التليفون الصمت الرهيب والجبن الشديد ساعتها هتحس انه كله فى سبيل الاعلانات وحرقة دم الناس خليهم يموتوا بالضغط احسن ما يموتوا بمرض تانى واهو يموتوا متكفر عن كل ذنوبهم
يا حكومتنا يا حكومتنا
حكومتنا بتدى درس مش للشعب لا دا درس لحكومات العالم كله بتقول لهم اتعلموا مننا احنا بنعمل ايه فى الشعب اللى قهر الرومان والهكسوس والانجليز والفرنسيين والاسرائيلين والاشوارين وانجولا وكوت ديفوار والكاميرون
بنعلمهم يمشوا على العجين مايلخبطهوش
درس موجع ويتعلم منه كل العالم
ربنا يستر فى اللى جاى وقلبى مع الموظفين اللى مالحقوش يتهنوا بالعلاوة
ال علاوه ال
اول زيارة ليا عندك
الى اقرب لقاء
رازى
بص انت جبت المفيد في اخر جملتين قولتهم
ربنا يريحنا منهم
اخوك : مصطفي
هما الجملتين اللي في الاخر دول هما اللي فيهم الشفا
تحياتي
إرسال تعليق