الثلاثاء، 11 مارس 2008

صبيحة يوم الاثنين 9/نوفمبر/2157




-ميدو: إمبارح يا نوءة كنت تعبان وعاوز أنام المهم اتكيت علي زرار النوم وقلت اناملي ساعتين كده وقلت للأنسان الالي يصحيني لكن الحيوان صحاني بدري 3 فيمتو ثانيه؟



-نوءه: إيه ده بجد ؟وعملت معاه ايه؟؟



-والله أنا قلتله لو عمل كده تاني أنا هغيره من مصنع الروبوتات اللي فالشارع اللي جنبنا؟



-عندك حق .. أنا اللي امبارح ادايقت شويه من الكلاتاتا(اختراع جديد بيعمل كل حاجه) أتكيت عالريموت عشان يرقصلي شرقي رقص ماكارينا بجد حاجه تخنق



- لأ أنا بقه مراتي دايقتني امبارح



-مين فيهم؟والله مش فاكر هي السبعتاشر تقريبا



-أه بقت حاجه تلخبط بس هما اتعودوا ومش بيزعلوا

- مش يحمدوا ربنا اننا لميناهم



-أه فعلا ..لكن عرفت ان المفتي قال بما إن عدد النساء لسه في تزايد مستمر فحلال انك تتجوز 30مش 25بس؟



-لأ ... والله مش عارف نعمل ايه فيهم المشكله ان انا بنسي احيانا البيت فين



- أه انا كمان ؟ بس أنا مش متخيل ازاي أيام زمان أيام 2008 كده كان الراجل هو اللي بيشتغل ويجيب شقه والست يادوب تساعده



-أه فعلا كانوا بيتعبوا لكن دلوقتي الستات بيشتغلوا ويجهزوا نفسهم وييجوا يطلبونا للجواز



-الزمن بيتغير يا نوءه



-معاك حق



-أنا ماقلتلكش علي اللعبه اللي مراتي أشترتهالي امبارح عشان اديها بوسه؟



-لا ؟



- جابتلي بلاي ستيشن 65




-إيه ده بجد؟ هو نزل فعلا


- أه يا عم ده مش بيخليك تنزل تلعب بس ده بيعمل حاجات أحسن كتير؟


-إزاي يعني؟

-يعني لو بتلعب انت وصاحبك اللي في تيجون(دوله جديده ماعرفهاش) وحبيت تتفق معاه علي حاجه مش لازم تقوله هو البلاي ستيشن بيعمل كده من نفسه


-أه فعلا دي ميزه جديده .


-انت متابع الأخبار بقه ولا ايه ؟


-أه امبارح شغلت الكلاتاتا علي قناة الفطيرة وتابعتها شويه


-وايه رأيك في موضوع أمريكا ؟؟؟


- والله صعبانين عليه بيقولك الماعونات اللي الصومال بتديهالهم مش كفايه؟؟
-أه فعلا أمريكا شعب كبير و60 ديشليون جنيه مش كفايه(الدشليون ده فلوس كتيرة أوي)


-وشفت المذابح اللي اسرائيل عملتها في فلسطين؟


-اه كانوا بيكلموا عنها امبارح في جامعة الدول العربيه وقالوا انهم لازم ياخدو موقف وان قراراتهم لازم تكون حاسمه المرة دي؟


-فعلا الأيام دي العالم كله بيتغير بشكل سريع جدا


-معاك حق بس انت شكلك مش متابع أخبار مصر؟


-أه مش أوي

-بس انا امبارح فتحت الكلاتاتا (اللي بيعمل كل حاجه) ولقيت المذيع بيقول..وهكذا يؤكد الشعب المصرى حبه وتأييده للسيد الرئيس أبو جمال وهم يهتفون قائلين نحن نؤيد ونبايع السيد الرئيس أبو جمال لفترة رئاسه جديده !!
-وبعدها طبعا اشتغلت أغنية اخترناه.. اخترناه



-إيه ده ما إنت عارف اهه ..!؟

هناك 9 تعليقات:

Unknown يقول...

يا يا اخى الدنيا جريت بسرعة بس قولى صحيح هو احنا قطعنا المعونة عن امريكا ولا دة اشاعات

ا لـعـبـد لـلــه يقول...

أكيد اشاعات مغرضه أنا اللي مطلعها..لان الوضع اللي احنا عليه بيقول ان ده مستحيل يحصل يا أيويه..وشكرا لتعليقك عالموضوع

Desert cat يقول...

esaipgtيااااااااااه
تصدق حلو نظام الستات اللى بيصرفوا عليه وهو قاعد يلعب جيم
والانسان الالى قليل الادب ده يتاخر عليه 3 فيمتو ثانيه لي ه كان المفروض عاقبه ورماه فى البحر

dr_clever يقول...

هههههههههههههههههههههههههههههه




قله المخدرات وحششششششششششششششششه
هههههههههههههههههههه

ayar يقول...

احلى حاجة انك غيرت فى كل حاجة ماعدا حال الدول العربية !! هههههه

*سمر* يقول...

هاهاهاها...
حلوة جدا التدوينة ...اسلوبك ساخر وجميل ...

ا لـعـبـد لـلــه يقول...

Desert cat :
أشكرك على التعليق وكويس انك من الناس اللي بتحب الأنتخه...ومين فينا مش بيحب الأنتخه بس للأسف الكلام ده هيحصل سنة2157ربنا يديلك طولة العمر !

ا لـعـبـد لـلــه يقول...

Ayar:هي دي مش أحلى حاجه فيه لكن أنا حبيت أكون واقعي شويه وبعدين انا ماغيرتش الصومال اللي بقيت القوة العظمى في العالم يعني حتي الصومال اتغيرت لكن مصر مش هتتغير

ا لـعـبـد لـلــه يقول...

*سمر* : أشكرك يا سمر على الإطراء الجميل ده (حلوة إطراء دي؟أصلي مالقتش غيرها)وأشكرك لزيارة المدونه والمواضيع القديمه بصفه خاصه.