الأحد، 23 مارس 2008
مصــر بتتقــدم بينــــا
هي بلدنا مشكلتها إيه..؟عمرك فكرت في السؤال ده؟
طيب حتى لو فكرت في مشكلتها ..!ياترى لقيت لمشكلة بلدك حل؟ ممكن واحد يكون جاي من كوكب تاني يقولي مافيش مشكلة!
عموما هو غلبان برضه وأنا هختصرله أخر الأخبار في الكام سطر الجايين دول....شوف ياسيدي....?
من كام شهر كده أساتذة الجامعه عملوا إعتصامات عشان عاوزين كادر هما كمان لأن قبلهم المدرسين إعتصموا عشان نفس الموضوع برضه وقبلهم عمال بعض الشركات الحكوميه عملو اعتصامات كتيرة برضه عشان نفس الموضوع ومواضيع تانيه زي ان الدولة عاوزه تبيع الشركات دي وترحل العمال دول.. يقعدوا في الشارع بقه أو يشحتوا حكومتنا مالهاش دعوة بحاجه من دي؟
المهم انك تقدر كل يوم وإنت صاحي من النوم تسأل أي حد هو النهارده إعتصام مين؟ وهو هيقولك على طول..
ولو كنت عاوز تعتصم فللأسف لازم تحجز من دلوقتي عشان مش هتلاقي يوم فاضي لمدة سنه قدام....يا راجل دي الحمير والكلاب (لا مؤاخذه) هتعتصم هي كمان خايفين على نفسهم وليهم حق.. لان الناس من كتر جوعها بدأت تاكل الحمير والكلاب (يع..!) .
وده طبعا غير مشكلة رغيف العيش اللي مش لاقيينه واللي بقينا بنقتل بعض في طوابير العيش عشانه..وده بترجع أسبابه لأن أصحاب المخابز بتبيع الدقيق لأصحاب المحلات بتاع الجاتو وده طبعا عشان الشعب يحلي ويتزبط أصدي يتفتوتر.
أه كنت هنسى... في كام واحد كده انتحروا بسبب غلاء الأسعار..بس مش مهم في غيرهم كتير.
طبعا دي كلها حاجات بسيطه كده, لأني لو فتحت في الكلام مش هخلص كتابه من هنا ليوم القيامه العصر.... .
أنا بيني وبينكوا فكرت (مش عارف ازاي بس ده اللي حصل وماتفتنوش عليه لأن التفكير في مصر تهمه عقوبتها مؤبد وانت طالع أمال هما بيأكلونا حمير ليه).. فكرت في مشكلتنا لقيت ان هي مشكلة إدارة لأني شايف ان الشعب المصري ده شعب مطيع جدا وممكن يعمل أي حاجه لو حس ان ده في مصلحته..يعني كل كام سنه تسمع عن تعديل وزاري و الغريب ان الحاله من سيئ الى أسوأ يبقى سياتك العيب مش في الوزيز بقه ..طيب ممكن..! لو ممكن يعني نغير الرئيس نفسه يمكن ربنا يكرم..؟ ويتصلح حالنا
عشان بجد البلد بتضيع واحنا الشباب يعني اللي هندوق مرارة ده كله لأن أبويا وأبوك لما لقوا البلد بتتنهب وشافوا بعنيهم ان مصر بتتسرق عيني عينك ماحدش قام وقال لأ وهنيجي في يوم نستلم البلد خرابه .
طيب خليني أسألك سؤال يعني ايه رئيس يفضل يحكم دولة لمدة 25سنه مش ده معناه انه ملاك نازل من السما أو إن مصر تعداد سكانها نسمه واحده بس؟ وان أنا وانت من بلد تانيه !
أنا شاب مصري عارف ان مستقبلي يا بيضيع يا ضاع قبل حتي ما يبدأ.. كلنا شايفين اللي بيحصل حوالينا ولازم يكون في حل .
اللي يدايق وينرفز الإعلانات اللي بتقولك مصر بتتقدم بينا ويكأننا عايشين في بلد تانيه خالص آه والله لكن عذرهم الوحيد إن الشعار ناقص أيوه ناقص هي بتتقدم ما قلناش حاجه بس بتتقدم علي فين انشاء الله.... ماحدش عارف؟؟
وانت بقه شايف مشكلتنا إيه.. وحلها ايه؟
الاشتراك في:
تعليقات الرسالة (Atom)
.jpg)
هناك 8 تعليقات:
انا شخصيا مشكلتى الاعلان بتاع مصر بتتقدم بينا هو اساسا احنا فين هو احنا موجودين اصل لو موجودين كان حد حس بينا وشاف مشاكلنا وحاول يحلها احنا مش موجودين اصلا علشان مصر تتقدم بينا
أشكرك يا أيويه علي التعليق ..ده أولا
ثانيا واضح انك بتتكلمي بإحساسك وانك زي معظم الناس الموجودين في البلد دي وعارفين ان مصر لا بتتقدم ولا نيله وان احنا إتعودنا ان حكومتنا تقول كلام خيالي على أساس اننا شعب أهبل بيصدق كل حاجه بتتقال ليه..؟
انا بقى ليه مفهوم تانى خااااااااالص فى حكايه مصر بتتقدم بينا
المفوم ده فى ان فيه ناس مننا مصريين برضوا بس مصر بتتقدم بيهم
الناس دول همه لعيبه الكوره و المغنيين و الرقاصين و اولاد المحاسيب
كل دول مصر بتتقدم بيهم و مصر هيه بلدهم فهمت بقى الاعلان
اولا احييك على اغنيه عايده العيوبى واللى بحبها جدا
اما عن حال بلدنا فانا مش حقدر اتكلم فى السياسه عشان مش يقفلوا لك المدونه بالشمع الاحمر
ولكن حتى الشعب المصرى حصل فيه طفره غريبه فى الاخلقيات والمبادىء والسلوكيات فأتغيرنا عن ايام زمان ايام الرقى والاخلاق والشعور بالانتماء وهذا ما تشاهده كل يوم فى سلوكيات الناس مع بعضها فى الشارع وغيرها فعلا اصبحنا بعاد جدا عن سلوكيات المصريين زمان ولا اعرف ما السبب هل اننا مستهدفون ان نصبح اسواء وهذا الاستعمار الجديد المستهدف منه تدمير عقول الشباب ام سوء احوال البلد لها دخل ولا ايه السبب ممكن يكون خليط من الاسباب
تحياتى
الجواز وسنينه: أنا كمان أتفق معاكي لأنك بتأكدي كلامي وان احنا مش مصريين وان حكومتنا بتتكلم عن شعب تاني غيرنا خالص هما الرقاصين وأولا الــــــ؟
وهما دول اللي مصر بتتقدم بيهم.
نبضات:أشكرك يا نبضات علي تعليقك وفعلا الناس كمان اتغيرت وده بسبب الاستعمار الجديد سواء داخلي أو خارجي لكن أنا شايف ان الحكومه كمان ليها دور في ده لأن السبب في ده أجهزة الاعلام واللي بتقدمه لأن بجد تأثير أجهزة الاعلام فضل فترة طويله جدا يتميز بدوره السئ والهدام لكن أعتقد انه بدأ يتزبط شويه في التلفزيون المصري وطبعا في حاجات تانيه كتير متعلقه بقوانين البلد أصلا..
فعلا الاضرابات كترت جدا بس يارب تبقى بفايدة وانا شايفة ان امورنا مش هاتتصلح الا لما تتغير الحكومة ويجيلنا ناس خايفة على مصلحة البلد مش فاكرين مصر تورتة عاوزين يخطفوا منها حتة قبل ماتخلص ..
ayar: كلنا بنقول يا رب الاضرابات تيجي بفايده في الآخر لكن الأكيد اننا لوم ماعملناش كده مش هيحصل حاجه بل بالعكس ممكن الأمور تسوء أكتر من كده كمان.يعني لازم نحاول ونعرف الحكومه اننا عارفين حقوقنا ؟
إرسال تعليق