الأحد، 30 مارس 2008
إضراب إبريل ولا كذبة إبريل
بصراحه كنت متردد بين فكرتين قبل ما أكتب البوست ده ..ياترى يا واد يا صالح تكتب عن كذبة إبريل ولا عن إضراب إبريل, وبعدين مش عارف الشيطان وسوسلي ولقيتني بقول يا خوفي ليكون إضراب إبريل هو نفسه كذبة إبريل (اللهم إخزيك يا شوشو) ..عموما أنا قررت أكتب عن إضراب إبريل لأنه أهم طبعا...
شوفوا بقه أولا فكرة الإضراب دي كانت بسبب إضراب عمال غزل المحله للمطالبه بحقوقهم الاقتصاديه وبعدين إتحولت الفكرة لغاية ما بقت حركة سياسية عامه, وده لما قررت مجموعة من أهم القوى والأحزاب السياسية إعلان يوم 6 إبريل 2008 يوم الغضب الشعبي .بعد ما كان مجرد إضراب لعمال شركة غزل المحله ,لكن الشهاده لله عمال غزل المحله ماكانوش بيطالبوا بالبدلات وزيادة الأجور ليهم وبس لكن لكل فئات وطبقات الشعب المصري ومن هنا بقى شعارهم" التغيير السياسي".
أحزاب الكرامة وكفاية والوسط والعمل وحركة موظفى الضرائب العقارية وحركة إداريى وعمال القطاع التعليمى ونقابة المحامين وحركة عمال المطاحن( ونحن فى انتظار رد ايجابى ان شاء الله من الاخوان المسلمين الذين كان يمثلهم فى الاجتماع السيد الكتاتنى رئيس الهيئة البرلمانية) وافقوا على التضامن مع حركة عمال المحلة، وإعتبار يوم الاحد 6 إبريل 2008 يوما للغضب الشعبى ضد النظام الجائر.
الإحتجاج مش بس هيكون على سوء الأوضاع في مصر وإنتشار الفساد, لكن هيكون كمان إحتجاج على سياسة الدولة الخارجيه زي مواقفها من غزة ده لو كان ليها موقف أصلا ومن القضية الفلسطينيه وتصدير الغاز الطبيعي لإسرائيل بأرخص ثمن والتمسك المميت بإتفاقية كامب ديفيد وموقفنا من المقاومه الأفغانيه واللبنانيه والعراقيه. من الآخر كده عاوزين نعرَّف الحكومه إننا فاهمين كل حاجه ومن هنا ورايح مش هنسيب حقوقنا تضيع .
وده طبعا غير مطالبنا إحنا واحتجاجنا على سياسة الدوله في الداخل وخد عندك يا سيدي...
عايزين مرتبات تعيشنا .................. مش عايزين رفع أسعار.
عايزين نشتغل .......................... مش عايزين محسوبيه.
عايزين تعليم لأولادنا .................... مش عايزين ظباط بلطجية.
عايزين مواصلات آدمية.................. مش عايزين تعذيب في الإقسام.
عايزين مستشفيات تعالجنا .............. مش عايزين أتاوات.
عايزين دواء لأطفالنا ................... مش عايزين فساد.
عايزين قضاء منصف .................. مش عايزين رشاوي.
عايزين أمن وأمان...................... مش عايزين إعتقالات.
عايزين حرية وكرامه .................. مش عايزين تلفيق قضايا.
عايزين شقق للعرسان.................. مش عايزين إنتهاك لكرامتنا.
أما المطلوب منك بقه إنك تبلغ أصحابك عن الإضراب وتقول لهم إننا عاوزين نكون إيجابيين مرة واحده على الأقل. وهنعمل إضراب عن العمل أو الدراسه وتشارك في المظاهرات السلميه وتطالب بحقوقك .
الإضراب هيكون في كل محافظات مصر .
إن شاء الله في البوست الجاي هعرفكوا أكتر عن الإضراب وعن أماكن الإضراب في كل المحافظات .
"شارك ...إتغير ... غيَّر مصر للأحسن"
وإنت رأيك ايه في فكرة الإضراب .. ولو فكرت تشارك ياترى هتطالب بإيه..!؟
الاشتراك في:
تعليقات الرسالة (Atom)
.jpg)
هناك 16 تعليقًا:
بص ياصالح انا فى العموم مبحبش المظاهرات لانها جعجعة بلا طحن ومش بتفيد لكن بجد لو حسيت ان الحركة دى هاتفيد هاعملها ومش هاخاف من حاجة حتى لو اتقلبت واتضربنا من الامن المركزى .. اهو نحس اننا اكيد فى مصر .. لكن لو قدرنا نحقق مطلبين بس من المطالب اللى انت رصتها دى يبقى خير وبركة !!!
ayar:أولا بشكرك على تعليقك
ثانيا أنا شايف عكسك لأن المظاهرات بتفيد لأنها بتقول ان الشعب ده مش سلبي وانه عارف حقوقه عشان كده بيعمل مظاهرات وبيعبر عن رأيه واقصد طبعا المظاهرات السلميه ..وكلنا نتمني ان اي حاجه من المطالب اللي رصيتها تتحقق لكن للأسف مش هتتحقق الا اذا جربنا وكنا ايجابيين وساعتهاهنشوف نتيجة اللي عملناه.
بص ياسيدى احنا بقينا أخصائيين اضرابات
بقولك ايه ماتيجى تزورنى؟
تحيــــــاتى
المصــــــــرى
مدونة جميلة ما شاء الله ..واسلوبك جميل ...
كويس جدا انك كتبت على الاضراب ..انا ان شاء الله ناوية اكتب عنه..وفعلا ضرورى جدا ان احنا نقول لكل الناس ..لازم نعمل حاجة بجد ..واهى خطوة ..ان شاء الله تجيب نتيجة
أشكرك يا سمر لزيارتك مدونتي ومنتظر موضوعك عن الاضراب وأكيد هيكون مختلف عن بتاعي وهستفيد منه ..
معاك حق لأننا في الفترة الأخيرة عملنا أكتر من اضراب لكن دي وسيلة متحضرة نطالب فيها بحقوقنا وأنا شايف ان ده صح لأنه بيعبر عن ايجابية شعب وهو ده اللي بيحصل في الدول الأوروبيه ..المهم يجيب نتيجة
وانشاء الله أزور مدونتك قريب جدا
المهم دى تبقى بدايه .مش خطوه ونقف .يعنى نقيس التغير بعدها .مفيش تغير نوسع الاضراب .ليومين فاكثر لحد ما يسمعونا
انا شايفة ان الإضراب وسيلة نعرف بيها الحكومة اننا في يوم ناوييين ننفجر وانه للصبر نهاية واتقي شر الحليم اذا غضب واحنا غلابة
كلنا حنضرب وانا اتعلمت اضرب ازاى من ايام المدرسة يارب فى الاخر مش احنا اللى ننضرب
مقولتليش حنبدأ الضرب الساعة كام
مفقوعة مرارتي من حماتــــــــــــي :بشكرك على التعليق وكويس انك بتأيدي كلامي لأن الغريب ان في ناس بيقولوا ان ده مالوش لازمه وناس تانيه بتقول العيب مش في الحكومه العيب فينا احنا ..انا معاهم ان احنا كمان عندنا غلطات لكن ردي عليهم ان الهرم بيتبني من تحت مش من فوق .
FaceMoon : أنا نزلت بوست جديد وأسف لو بتأخر في الرد على التعليقات ده بالنسبه للناس اللي بتدخل تاني تشوف تعليقها..ماعلينا؟ أنا زرت مدونتك وبجد بحب المدونات المنظمه جدا جدالأنها بتفتح نفسي..أشكرك لزيارتك الأولي ويارب ماتكونش الأخيرة
ربنا يستر وميكنش الاضراب كدبة ابريل
مدونه حلوة
احترامى لك
نهر الحب : لا ماتقلقيش اشاء الله ولو عندك شك تقدر تروح عند أقرب مكان ليك وتشارك في الإضراب ...عشان تصدق
لا لحسنى مبارك على كل عملة ورقية فيكى يامصر
ياريت كلنا نتبنا الحملة دية
تخيل كل عملة فى مصر مكتوب عليها لا لمبارك
الشعب خايف وديه وسيلة سلمية تماما عشان الناس تشجع بعض !!
لا لحسنى مبارك على كل عملة ورقية فيكى يامصر
ياريت كلنا نتبنا الحملة دية
تخيل كل عملة فى مصر مكتوب عليها لا لمبارك
الشعب خايف وديه وسيلة سلمية تماما عشان الناس تشجع بعض !!
لا لحسنى مبارك على كل عملة ورقية فيكى يامصر
ياريت كلنا نتبنا الحملة دية
تخيل كل عملة فى مصر مكتوب عليها لا لمبارك
الشعب خايف وديه وسيلة سلمية تماما عشان الناس تشجع بعض !!
إرسال تعليق